🇦🇲/🇷🇺

«Հայրենադարձների ինտեգրման կենտրոն»-ն ամբողջությամբ պատրաստ է. հայտնի է աշխատանքի մեկնարկի ժամկետը

Հայաստանում շուտով իր դռները կբացի «Հայրենադարձների ինտեգրման կենտրոն»-ը, որը հիմնվում է Սփյուռքի գործերի գլխավոր հանձնակատարի գրասենյակի կողմից: Այն տեղակայվելու է Երևանի սրտում՝ Հանրապետության 37 հասցեում: «Արմենպրես»-ի հետ զրույցում «Հայրենադարձների ինտեգրման կենտրոն»-ի ստեղծման ծրագրի համակարգող Մարգարիտա Բաղդասարյանը տեղեկացրեց, որ հատկացված համապատասխան տարածքի շինարարական աշխատանքներն արդեն մոտենում են ավարտին:

«Մեր հիմնական գործընկերը՝ «Հրայր և Աննա Հովնանյան» հիմնադրամը, ֆինանսավորել է ամբողջ հարդարման և վերանորոգման աշխատանքները: Ընդհանուր առմամբ, աշխատանքներն այս ուղղությամբ, կարելի է ասել, ավարտված են: Գործ ունենք անելու կահավորման հետ կապված, այնուհետև տեղափոխման գործընթացը կլինի: Կարծում եմ, որ գարնան վերջ կկարողանանք մեր դռները բացել հայրենադարձների համար»,- ասաց Մարգարիտա Բաղդասարյանը:

Սփյուռքի գործերի գլխավոր հանձնակատարի գրասենյակը նպատակ ունի բարձրացնել հայրենադարձների հետ աշխատանքի արդյունավետությունը. իրականացնել սպասարկում՝ մեկ պատուհանից, ավելի շատ ծառայությունների հասանելիություն ապահովել սփյուռքահայերին:

«Մեր նպատակն է՝ այնպես անել, որ հայրենադարձները արագ ու հեշտությամբ ինտեգրվեն Հայաստանում: Բուն մեր աշխատանքը լինելու է այն, որ հայրենադարձությամբ հետաքրքրվող, նաև՝ արդեն Հայաստան տեղափոխված մեր հայրենակիցներին օգնենք, աջակցություն տրամադրենք, խորհրդատվություն տրամադրենք մեկ տեղից: Չէ՞ որ նրանք իրազեկված չեն, մյուս կողմից էլ՝ որոշ տեղերում բյուրոկրատական հարցեր են լինում: Ահա այս կենտրոնը կլինի նրանց կողքին»,- շեշտեց Մարգարիտա Բաղդասարյանը:
Ըստ նրա՝ այս կենտրոնի ստեղծումն ընդգծում է պետական մոտեցումը հայրենադարձության հարցերի հետ կապված: Ստեղծվում է կենտրոն, որտեղ հայրենդարձների հարցերին պատասխան է տրվելու, նրանց խնդիրներն են լուծվելու, աջակցություն ու խորհրդատվություն են ստանալու: Այսօր էլ Սփյուռքի գործերի գլխավոր հանձնակատարի գրասենյակն այդ ծառայություններն ինչ-որ չափով տրամադրում է, սակայն նոր կենտրոնն առավել ընդլայնված աշխատակազմով ու ծառայությունների լայն շրջանակով է աշխատելու: Կենտրոնը լինելու է տեղ, որտեղ սպասելու են հայրենադարձներին:

Նախատեսված է անցկացնել հայոց լեզվի ընդգրկուն դասընթացներ, սեմինարներ՝ իրազեկելու, թե ինչպե՞ս կարելի է ՀՀ-ում բիզնես բացել, ի՞նչ հարկային, մաքսային պայմաններ են գործում, աշխատաշուկայում ինչպիսի՞ միտումներ կան և այլն:
Կենտրոնը կատարելու է նաև հայրենադարձների տվյալների թվայնացում: Գույքագրվելու են բոլոր խնդիրները, դրանցից ելնելով՝ ներկայացվելու են առաջարկություններ՝ տարբեր գործընթացները հայրենադարձների համար դյուրացնելու նպատակով:

«Կենտրոնի նպատակներից մեկն է նաև հայրենադարձության ամբողջ պրոցեսը համակարգելն ու թվայնացնելը: Ցավոք, այսօր չունենք այդ թվայնացման համակարգը, բայց այն ստեղծվում է: Հայրենադարձներն այդ համակարգում կկարողանան ստեղծել իրենց անձնական էջերը, լրացնեն տվյալները ու կապի դուրս գան ինտեգրման կենտրոնի աշխատակիցների հետ: Հայաստան տեղափոխվելիս արդեն կունենանք ամբողջական պատկերը, կվերհանենք առաջնահերթ խնդիրները, ըստ այդմ էլ՝ կլինի մեր արձագանքն, առաջարկվող լուծումները»,-ասաց նա:

Հայաստան տեղափոխվելու հարցերով վերջին տարիներին մեծաթիվ հետաքրքրվողներ կան: 2022 թվականին Հայաստանի քաղաքացիության համար դիմել է 25 հազար հայ: Իհարկե, քաղաքացիություն ստանալը դեռ հայրենադարձություն չէ, սակայն ոլորտի պատասխանատուները նշում են, որ գործընթացը սկսվում է հենց դրանից: Վերջին շրջանում Հայաստան եկածներից շատերը ՌԴ-ից են, Սիրիայից, Լիբանանից: Հայաստան տեղափոխվելու գործընթացով հետաքրքրվում են նաև Ավստրալիայից, Արգենտինայից և այլ երկրներից: